စာသားနှင့် ဓာတ်ပုံ – ခွန်လတ်
ရန်ကုန်မြို့လယ်ကောင် ကျောက်တံတား၊ ပန်းဘဲတန်းမြို့နယ်တွေက မြန်မာနိုင်ငံမှာ လူနေသိပ်သည်းတဲ့မြို့နယ် နှစ်ခုဖြစ်ပေမဲ့ လောလောဆယ် ကိုဗစ် ၁၉ ဗိုင်းရပ်စ်ပိုးတွေ့လူနာရှိတဲ့မြို့နယ်တွေကို တားမြစ်ကန့်သတ်မိန့် ထုတ်ပြန်ရာမှာ ပါသွားကြလို့ ခါတိုင်းပျားပန်းခပ်လှုပ်ရှားသက်ဝင်နေတဲ့လမ်းတွေဟာ ငြိမ်သက်ကုန်ကြပါတယ်။
Hkun Lat | Frontier
ရန်ကုန်မြို့ အနောက်ပိုင်းခရိုင် ကိုးမြို့နယ်ထဲက ကျောက်တံတား၊ ပန်းဘဲတန်းမြို့နယ်တွေက ဧပြီ ၂၅ ရက်မှာ ရန်ကုန်တိုင်းဒေသကြီးရဲ့ အတည်ပြုကိုရိုနာဗိုင်းရပ်စ်လူနာ ၁၁၂ အနက် ၃၀ ဦးတွေ့ရတဲ့ မြို့နယ်တွေဖြစ်ပြီး ဗဟန်းက ၁၂ ဦးနဲ့အများဆုံးဖြစ်ကာ ပန်းဘဲတန်းက ခုနစ်ဦးနဲ့ဒုတိယလိုက်ပြီး တစ်ဦးသေဆုံးပါတယ်။ ကျောက်တံတားမှာ လူနာနှစ်ဦးတွေ့ရှိရပါတယ်။
Hkun Lat | Frontier
ပန်းဘဲတန်းက ဧပြီ ၁၈ ရက် ကျန်းမာရေးနှင့်အားကစားဝန်ကြီးဌာနအမိန့်အရ တားမြစ်ကန့်သတ်ခံရတဲ့ ရန်ကုန်တိုင်း ခုနစ်မြို့နယ်ထဲ ပါဝင်သွားတဲ့တခုတည်းသောမြို့တွင်းမြို့နယ်ဖြစ်ပါတယ်။ ဒီအမိန့်ကြောင့် မြို့တွင်းလမ်းတွေ ခြောက်ကပ်သွားကုန်ပါတယ်။ အစိုးရဝန်ထမ်းတွေ၊ ကုမ္ပဏီဝန်ထမ်းတွေ၊ အလုပ်လာလုပ်တဲ့ အလုပ်သမားတွေကလွဲလို့ ရပ်ကွက်တွင်းနေသူအားလုံး အိမ်မှာပဲ နေကြရပါတယ်။ လိုအပ်တာဝယ်ဖို့ အိမ်သားတစ်ဦးပဲ ဝင်ထွက်ခွင့်ရပြီး ခရီးသည်တင်ကားတွေသာ မြို့နယ်တွင်းဖြတ်ခွင့်ရပါတယ်။
Hkun Lat | Frontier
ပန်းဘဲတန်းမြို့နယ် လမ်းထိပ်တိုင်းမှာ စစ်ဆေးရေးဂိတ်တွေရှိကြပြီး ဂိတ်မှာ အချိန်နဲ့နေရာကို မှတ်တမ်းတင်ပါတယ်။ တားမြစ်ကန့်သတ်မိန့်မထုတ်ခင်နဲ့ ထုတ်ပြီးနောက် လမ်းသားတွေက ဂိတ်တွေကို ထားရှိကြီးကြပ်ကြတာဖြစ်ပါတယ်။
Hkun Lat | Frontier
ဂိတ်တွေကို ဆောက်လုပ်ရေးလုပ်ငန်းနဲ့ လမ်းတံတားသုံး ပလတ်စတစ်တုံး၊ ပလတ်စတစ်ကြိုးတွေ၊ ဝါးလုံးတွေ၊ စားပွဲခုံတွေ၊ မိုးကာတွေနဲ့ ဖန်တီးထားကြပါတယ်။ စေတနာ့ဝန်ထမ်း ခြောက်ယောက်၊ ခုနစ်ယောက်နဲ့ စစ်ဆေးကြပ်မတ်နေကြပါတယ်။
Hkun Lat | Frontier
စေတနာ့ဝန်ထမ်းတွေက သူတို့တာဝန်ကို တင်းတင်းကျပ်ကျပ်ဆောင်ရွက်ကြပါတယ်။ လမ်းသားတွေကို တစ်ရက် နှစ်ကြိမ်ပဲ သွားလာခွင့်ပြုပါတယ်။ လမ်းထဲကို အပြင်လူဆိုရင် ဆွေမျိုးသားချင်းတွေကိုတောင် ဝင်ခွင့််မပြုပါဘူး။ အစားအစာမှာစားရင် ဂိတ်မှာ မနက် ၇ နာရီက ည ၁၀ နာရီအတွင်း လာယူခွင့်ပြုပါတယ်။
Hkun Lat | Frontier
တခါတရံ ဂိတ်မှာအငြင်းပွားတတ်ကြပါတယ်။ စစ်ဆေးရေးဂိတ်မှာ လုံခြုံရေးတာဝန်ယူထားသူနဲ့ လမ်းသားတစ်ဦးတို့ အဲကွန်းပြင်ဆရာကို ဝင်ခွင့်မပေးလို့ စကားအချေအတင်များနေကြတာ Frontier ကတွေ့ခဲ့ရပါတယ်။
Hkun Lat | Frontier
လမ်းသားက ပြင်ဆရာကို သူတာဝန်ယူကြောင်းပြောပေမဲ့ လုံခြုံရေးက ရပ်ကွက်ဥက္ကဋ္ဌခွင့်ပြုမှ ဝင်ခွင့်ပြုနိုင်မယ့်အကြောင်း ပြောပါတယ်။
Hkun Lat | Frontier
လုံခြုံရေးတာဝန်ယူထားသူက တားမြစ်မိန့်ထုတ်ရတာ၊ တခြားကန့်သတ်ချက်တွေထားရတာ ကိုရိုနာဗိုင်းရပ်စ် မပြန့်ပွားအောင်လုပ်ရမှန်း အသိအမှတ်မပြုချင်ကြဘူးလို့ စိတ်ပျက်လက်ပျက်ညည်တွားပါတယ်။
Hkun Lat | Frontier
“တချို့တွေက ဒီမှာ ဘာလို့တားနေရသလဲဆိုတာ သဘောမပေါက်ကြဘူးဗျာ။ သူတို့က မကျေမနပ် ပြန်ပြောကြဖို့ပဲ သိတယ်။ ကျွန်တော်တို့က ဗိုင်းရပ်စ်ပိုးကင်းစင်စေဖို့ အပင်ပန်းခံလုပ်နေကြရတာလေဗျာ” လို့ လုံခြုံရေးတစ်ဦးကပြောပါတယ်။
