တရုတ်နယ်စပ်ကမြို့ ကိုရိုနာ ကြောက်သလား

COVID-19 ရောဂါစတင်သည့် တရုတ်နိုင်ငံသည် ရောဂါ၏အဆိုးဝါးဆုံးအခြေအနေကို ကျော်ဖြတ်ခဲ့ပြီးချိန်တွင် ကမ္ဘာ့နိုင်ငံများက ရောဂါ၏အဆိုးဝါးဆုံးအခြေအနေကိုစတင်ခံစားနေခဲ့ရပြီဖြစ်သည်။
ယင်းအခြေအနေတွင် တရုတ်နိုင်ငံနှင့်မိုင်ပေါင်း ၃၀ ကျော်ထိစပ်နေသည့် ကိုးကန့်ကိုယ်ပိုင်အုပ်ချုပ်ခွင့်ရဒေသ၏ အခြေအနေကို Frontier က လွန်ခဲ့သောရက်သတ္တပတ်က သွားရောက်လေ့လာခဲ့ပါသည်။

နန္ဒ

မြန်မာ-တရုတ် နယ်စပ်ဝင်ပေါက်တစ်ခု ဖြစ်သည့် ရန်လုံကျိုင်းဂိတ်သည် လွန်ခဲ့သော ငါးနှစ်က တပ်မတော်နှင့်ကိုးကန့်တပ်ဖွဲ့ MNDAA တို့၏ပြင်းထန်သောတိုက်ပွဲများအကြား စစ်တလင်းဖြစ်ခဲ့ရသည်။
ကိုးကန့်တိုက်ပွဲအမှတ်တရကျည်ဆန်ရာများရှိနေသေးသည့် ရန်လုံကျိုင်းသည် လက်ရှိတွင်လည်း ဆန်းပြားခြားနားသည့် အန္တရာယ်ရနံ့သင်းနေပြန်သည်။
ယခင်ကလို သေနတ်များ၊ကျည်ဆံများနှင့်ရင်ဆိုင်နေရခြင်းမဟုတ်ဘဲ မျက်နှာဖုံးများ၊အပူချိန်တိုင်းကိရိယာများ၊ရောဂါကာကွယ်ရေးဝတ်စုံများဖြင့်ရင်ဆိုင်တွန်းလှန်နေသည့် အန္တရာယ်မျိုးဖြစ်သည်။
ကွမ်ယင်မယ်တော်ရုပ်တုထည့်သွင်းတည်ဆောက်ထားသောကိုးကန့်ယဉ်ကျေးမှုထုံမွှန်းနေသည့်ဂိတ်ကိုလွန် လိုက်လျှင် ဟိုဘက်ခြမ်းသည် တစ်ကမ္ဘာလုံးကိုခြိမ်းခြောက်နေသည့် COVID-19 စတင်ခဲ့ရာတရုတ်ပြည်ဖြစ်သည်။
သို့သော် ရန်လုံကျိုင်းဂိတ်တံခါးသည် ဖွင့်ထားလျက်။

မြန်မာ-တရုတ် နယ်စပ်ဝင်ပေါက် ရန်လုံကျိုင်းဂိတ်အား မတ်လ ၁၀ ရက်ကတွေ့ရစဉ်။ ဓာတ်ပုံ-နန္ဒ

လူတွေရောကားများပါ ဝင်ထွက်သွားလာလျက်။
“တရုတ်ပြည်ဘက်က လူတစ်ယောက်ကူးလာတာမြင်လိုက်တာနဲ့ သူ့ဆီမှာရောဂါပိုးပါလာမှာလားဆိုတဲ့စိုးရိမ်မှုကအပြည့်ပဲ” ဟု ဇန်နဝါရီ ၂၇ ရက်ကထဲက ဂိတ်တွင်တာဝန်ကျနေသည့် ကျန်းမာရေးဝန်ထမ်းတစ်ဦးက ပြောသည်။
သို့သော် ကံအားလျှော်စွာပင်(မတ် ၁၈ ရက်အထိ) မြန်မာနိုင်ငံတွင် COVID-19 ရောဂါကူးစက်ခံရသူတစ်ဦးမှမတွေ့သေးပါချေ။

ခြောက်ကပ်ကပ်ကစားဝိုင်းများ

တရုတ်နှစ်သစ်ကူးကာလသည် လောက်ကိုင်အတွက်အမြဲပျော်ရွှင်ရသည့်နှစ်သစ်ကူးတော့မဟုတ်ပါချေ။ ၂၀၁၅ ခုနှစ်က နှစ်သစ်ကူးကာလမှာပင် ကိုးကန့်ခေါင်းဆောင်ဦးဖုန်ကြားရှင်၏ တပ်ဖွဲ့နှင့်တပ်မတော်တို့၏တိုက်ပွဲများပြင်းထန်ခဲ့ပြီး လောက်ကိုင်၏နှစ်ကူးကာလသည် ဗျောက်အိုးသံများအစားသေနတ်သံများကနေရာယူခဲ့ပြီးထိတ်ထိတ်လန့်လန့်ဖြစ်ခဲ့ရသည်။ ယခုတရုတ်နှစ်သစ်ကူးကာလတွင်လည်းလောက်ကိုင်သည် COVID-19 ကြောင့် ထိတ်လန့်တကြားဖြစ်ခဲ့ရပြီး နှစ်သစ်ကူးဧည့်သည်များရောက်မလာနိုင်ခဲ့ကြပါ။ ကျန်းမာရေးဝန်ကြီးဌာနဝန်ထမ်းများနှင့်ဒေသအုပ်ချုပ်ရေးအာဏာပိုင်များက ရောဂါကာကွယ်ရေးကို တတ်နိုင်သမျှကိုင်တွယ်ဆောင်ရွက်ပြီးနောက် မြို့သည်ပုံမှန်နီးပါးလည်ပတ်နေပြီဖြစ်သည်။
“ဖြစ်ကာစကတော့ကြောက်ကြတယ်။ အခုကတော့အားလုံးပုံမှန်ပါပဲ။”ဟု လောက်ကိုင်မြို့တွင် ရန်ကုန်မှလာရောက်အလုပ်လုပ်နေသူ ကိုအောင်သူက မတ်လ ၁၂ ရက်တွင်ပြောသည်။ သူကိုယ်တိုင်ကတော့ မျက်နှာဖုံးတပ်ထားပါသည်။
လမ်းပေါ်တွင် လူဆယ်ဦးလျှင် ၃ဦးခန့်က မျက်နှာဖုံးတပ်ထားသည်။
လောက်ကိုင်လမ်းမများပေါ်တွင် လူတွေပုံမှန်လှုပ်ရှားသွားလာနေကြသော်လည်း သိသိသာသာလူရှင်းသွားသည့်နေရာများတော့ရှိနေသည်။

ကာစီနိုနှင့်ဟိုတယ်ဝန်းတစ်ခုတွင်တွဲဖွင့်ထားသည့် ဈေးဝယ်လျှောက်လမ်းတစ်ခု။ ဓာတ်ပုံ-နန္ဒ

တရုတ်ဧည့်သည်များကို အားပြုနေရသည့် ကာစီနိုရုံများဖြစ်ပါသည်။COVID-19ကြောင့်တရုတ်ဘက်ကအဝင်အထွက်တင်းကြပ်လိုက်ချိန်တွင် ဧည့်အဝင်ကျခဲ့ရခြင်းဖြစ်သည်။
မြို့ခံတစ်ဦး၏အကူအညီဖြင့် Frontier က ကာစီနိုသုံးခုကိုသွားရောက်လည်ပတ်ခဲ့သည်။ မြို့ခံက သူ့ပစ္စတိုကိုလုံခြုံရေးထံအပ်လိုက်သည်။ မျက်နှာဖုံးတပ်ထားသော ကိုးကန့်တိုင်းရင်းသားလုံခြုံရေးကအပူချိန်တိုင်းတာပြီးနောက် မျက်နှာဖုံးတပ်မှ ဝင်ခွင့်ပြုသည်။
ကာစီနိုထဲတွင် လူရှင်းလျက်ရှိသောကစားဝိုင်းအမြောက်အများကိုတွေ့ခဲ့ရသည်။
ပုံမှန်ဆိုလျှင် ကာစီနိုကစားရုံတစ်ခုတွင် ဝန်ထမ်းရောထိုးသားပါပေါင်းလျှင် လူဦးရေက ထောင်ဂဏန်းအထိရှိသည်။ တိုက်ပွဲပြင်းထန်ခဲ့သည့် ၂၀၁၅ခုနှစ်ကာလကပင် ယခုလောက်ဧည့်အဝင်မကျဘူးကြောင်း မြို့ခံက Frontier ကိုပြောသည်။ ထို့နောက် သူက ကာစီနိုပိုင်ရှင်၏ လူယုံတစ်ဦးနှင့်မိတ်ဆက်ပေးသည်။
“ကျွန်တော်တို့ သုံးလဆက်တိုက်အရှုံးပေါ်နေပြီ။ ဒီရောဂါကြီးမြန်မြန်ပြီးသွားဖို့မျှော်လင့်နေတယ်”ဟု ကာစီနိုနှင့်တွဲထားသောဟိုတယ်လော်ဘီတွင်ထိုင်ရင်းသူကပြောသည်။
မြန်မာနိုင်ငံအပါအဝင် ကမ္ဘာတစ်လွှားတွင် လူစုလူဝေးမလုပ်ကြဖို့ တားမြစ်ထားသော်လည်း သူက ကစားဝိုင်းလူစည်ရန် ဧည့်မျှော်နေသည်။
ကစားဝိုင်းတွင်လူရှင်းခြင်း၏တိုက်ရိုက်အကျိုးဆက်အဖြစ် အထပ်မြင့်ဟိုတယ်ကြီးကလည်းလူရှင်းလျက်ရှိသည်။
ကာစီနိုထဲတွင် အွန်လိုင်းမှလောင်းကစားလုပ်နိုင်သည့် ကစားနည်းများလည်းရှိသည်။ သို့သော် ဒါတွေက ယခင်ကထဲကရှိနေခြင်းဖြစ်သည်။
“သူတို့တွေက ဖဲကိုင်ရမှယင်းပြေတာ” ဟု တရုတ်တို့လောင်းကစားဝါသနာကြီးပုံကို မြို့ခံကရှင်းပြသည်။
နယ်မြေလုံခြုံရေးနှင့် ညမထွက်ရအမိန့်များချမှတ်ထားသည့် ကြားမှပင် နယ်စပ်ခိုးဝင်ပေါက်များမှတစ်ဆင့် ဧည့်သည်များကို ကားဖြင့်သွားကြိုခဲ့ရသည့်အတွေ့အကြုံများကိုသူကပြောပြသည်။ လက်ရှိအခြေအနေသည် အခက်ခဲဆုံးဖြစ်ကြောင်းသူကဆိုသည်။
တရုတ်ဘက်ကကျန်းမာရေးစစ်ဆေးမှုကိုအထူးတင်းကြပ်ထားပြီးနယ်စပ်ဖြတ်ကျော်ရန်ခိုင်လုံသောအ ကြောင်းပြချက်ရှိသူများကိုသာမြန်မာဘက်သို့ကူးခွင့်ပြုကြောင်းကိုးကန့်ကိုယ်ပိုင်အုပ်ချုပ်ခွင့်ရဒေသ၏အမျိုးသားလွှတ်တော်ကိုယ်စားလှယ် ဦးကျော်နီနိုင်က Frontier သို့ပြောသည်။
တရုတ်နိုင်ငံသို့ နှစ်သစ်ကူးပြန်သွားပြီးနောက် ပြန်မလာနိုင်သောတရုတ်သူဌေးများ၏ဆိုင်ခန်းအချို့ကတော့ သော့ပိတ်ချက်။

ပိတ်ထားသောဆိုင်ခန်းအချို့။ဓာတ်ပုံ-နန္ဒ

ပိတ်ထားသောဆိုင်ခန်းအချို့။ဓာတ်ပုံ-နန္ဒ

ဘာတွေပြင်ဆင်ထားလဲ

လောက်ကိုင်မြို့နယ်တွင် တရုတ်နှင့်တရားဝင်နယ်စပ်အဝင်အထွက်ဂိတ်နှစ်ခုရှိပြီး တစ်ခုမှာလောက်ကိုင်မြို့ရှိ ရန်လုံကျိုင်းဂိတ်ဖြစ်ပြီး အခြားတစ်ခုမှာချင်းရွှေဟော်မြို့ရှိ နမ့်ဖာဟော်ဂိတ်ဖြစ်သည်။ ကြံခုတ်ရာသီဖြစ်ရာ ကြံသယ်သည့်ကာများကမြန်မာဘက်မှတရုတ်ဘက်သို့အဝင်အများဆုံးဖြစ်နေသည်။
ဖရန်တီယာ၏ကွင်းဆင်းလေ့လာချက်အရ ဂိတ်နှစ်ခုလုံးလူအဝင်အထွက်ကိုပိတ်မထားဘဲ ဝင်ရောက်လာသူများကို အပူချိန်တိုင်းကိရိယာဖြင့်တိုင်းတာပြီးဝင်ခွင့်ပြုသည်။

အပူချိန် ၃၈ ဒီဂရီဆဲဆီးယပ်နှင့်အထက် ဆိုပါက သံသယလူနာအဖြစ်စောင့်ကြည့်မည်ဖြစ်သည်။ နယ်စပ်ဂိတ်မှာဋ္ဌာနဆိုင်ရာပေါင်းစုံပါဝင်သောပူးပေါင်းအဖွဲ့ဖြစ်ပြီး အပူချိန်တိုင်းတာခြင်းကိုလည်း ကျန်းမာရေးဝန်ထမ်းများအပြင် အခြားဝန်ထမ်းများကပါ ကူညီတိုင်းတာပေးကြသည်။ ၃လနီးပါးတာဝန်ကျသဖြင့်ကျန်းမာရေးဝန်ထမ်းများမှာ ပင်ပန်းနွမ်းနယ်နေပုံပေါ်သည်။
လောက်ကိုင်ခရိုင်ဆေးရုံရှိ လူနာစောင့်များနားနေဆောင်ကို သံသယလူနာတွေ့ပါက သီးသန့်ခြေချုပ်ထားရန် သီးခြားဆောင်အဖြစ်အသွင်ပြောင်းလိုက်ပြီး အဆောင်ကိုသော့ခတ်ထားသည်။

လောက်ကိုင်ခရိုင်ဆေးရုံရှိ လူနာစောင့်များနားနေဆောင်ကို သံသယလူနာတွေ့ပါက သီးသန့်ခြေချုပ်ထားရန် သီးခြားဆောင်အဖြစ်အသွင်ပြောင်းထားပုံ။ ဓာတ်ပုံ-နန္ဒ

အဆောင်မှာ လူနာ ၁၂ ယောက်စာအတွက်ဖြစ်ပြီး သံသယလူနာတွေ့ရှိပါက လုပ်ဆောင်ရမည့်အချက်များကို ဝန်ကြီးဌာနက ညွှန်ကြားထားပြီးဖြစ်ကြောင်း လောက်ကိုင်ပြည်သူ့ကျန်းမာရေးဌာနမှ ဒေါက်တာဇော်ထွန်းငြိမ်းကပြောသည်။
“လောက်ကိုင်မှာတော့ သံသယလူနာမတွေ့သေးဘူးဗျ။တရုတ်ဘက်လည်း quarantine အရမ်းကောင်းတယ်” ဟု သူကပြောသည်။
နမ့်ဖာဟော်နယ်စပ်ဝင်ပေါက်ရှိသော ချင်းရွှေဟော်တိုက်နယ်ဆေးရုံတွင်မူ သီးသန့်လူနာဆောင် နှစ်ခန်းရှိကြောင်း တာဝန်ကျကျန်းမာရေးဝန်ထမ်းတစ်ဦးကပြောသည်။
နမ့်ဖာဟော်ဂိတ်သည် တရုတ်တွင်ကိုရိုနာဂယက်ပြင်းထန်စွာရိုက်ခတ်နေသည့် ဇန်နဝါရီလကုန်ပိုင်းမှဖေဖော်ဝါရီ လဆန်းအတွင်းက တရုတ်နိုင်ငံတွင်စိုက်ပျိုးရေးလုပ်ငန်းသွားရောက်လုပ်ကိုင်နေသည့် မြန်မာလုပ်သားများအများဆုံးပြန်လာသည့်ဝင်ပေါက်ဖြစ်သည်။

နမ့်ဖာဟော်နယ်စပ်ဝင်ပေါက်တွင် တရုတ်ပြည်မှပြန်ဝင်လာသူများကို ကျန်းမာရေးဝန်ထမ်းတစ်ဦး အပူချိန်တိုင်းနေစဉ်။ ဓာတ်ပုံ-ဇင်ဇင်/ ပြန်ဆက်

ဂိတ်တွင်တာဝန်ကျသည့်လူဝင်မှုကြီးကြပ်ရေးအရာရှိတစ်ဦး၏ပြောပြချက်အရ အဆိုပါကာလက ဆယ်ရက်အတွင်းမြန်မာလုပ်သားရှစ်ထောင်ကျော် တရုတ်ဘက်မှပြန်လည်ဝင်ရောက်ခဲ့သည်ဟုဆိုသည်။
၎င်းတို့ကို အပူချိန်တိုင်းပြီးမှဝင်ရောက်ခွင့်ပြုခဲ့ရာ သံသယလူနာတစ်ဦးမှမတွေ့ကြောင်း တာဝန်ကျ ကျန်းမာရေးဝန်ထမ်းတစ်ဦးကပြောသည်။

ကျန်းမာရေးဝန်ကြီးဌာန၏ညွှန်ကြားချက်များကို ကိုးကန့်ဘာသာဖြင့်ပြန်ဆိုထားသော COVID-19 ကာကွယ်ရေးအသိပညာပေးခြင်း ဆိုင်းဘုတ်များကို လောက်ကိုင်မြို့ထဲတွင်တွေ့ရသည်။

လောက်ကိုင်ခရိုင်ဆေးရုံရှေ့ရှိ ပညာပေးဆိုင်းဘုတ်။ ဓာတ်ပုံ-နန္ဒ

ထို့အပြင် အများပြည်သူနှင့်သက်ဆိုင်သောနေရာများတွင် ဗိုင်းရပ်စ်နှင့်ပတ်သက်၍အသိပညာပေးကို စပီကာနဲ့တရုတ်မြန်မာနှစ်ဘာသာဖြင့်အသံလွှင့်ကြေညာပေးနေသည်။
တရုတ်ဘက်တွင်အရှိန်အမြင့်ဆုံးဖြစ်ပွားနေချိန်တွင် ပိုးသတ်ဆေးဖျန်းခြင်း၊အပူချိန်တိုင်းခြင်း၊မျက်နှာဖုံးများအခမဲ့ဝေပေးခြင်း၊အရည်အသွေးမပြည့်မီသောမျက်နှာဖုံးများကိုဖျက်ဆီးပစ်ခြင်းကိုကျန်းမာရေးဝန်ကြီးဌာနဝန်ထမ်းများနှင့်ဒေသအုပ်ချုပ်ရေးအာဏာပိုင်များကပြုလုပ်ခဲ့သည်။

အရည်အသွေးမပြည့်မီသောမျက်နှာဖုံးများကိုမီးရှို့ဖျက်ဆီးနေစဉ်

COVID 19 ကြောက်သလား

နိုင်ငံပေါင်း ၁၅၂ နှစ်နိုင်ငံတွင် လူပေါင်းတစ်သိန်းခွဲကျော်ကူးစက်ခံရပြီး ခြောက်ထောင်ကျော်သေဆုံးလျက်ရှိသော COVID 19 ကို ကမ္ဘာလုံးဆိုင်ရာကပ်ရောဂါအဖြစ် ကမ္ဘာ့ကျန်းမာရေးအဖွဲ့ချုပ်က သတ်မှတ်ထားသည်။ သေဆုံးသူ စုစုပေါင်း၏တစ်ဝက်မှာ ရောဂါစဖြစ်သည့် တရုတ်ပြည်မှဖြစ်သည်။
ကမ္ဘာ့နိုင်ငံများသည် ကိုရိုနာ ဗိုင်းရပ်စ်အပေါ်လုံလောက်သည့်အလေးအနက်ထားမှုမျိုးမရှိခဲ့သည့်အတွက် ယခုလောက်ကူးစက်မှုမြန်ဆန်ခဲ့ရခြင်းဖြစ်ကြောင်း ကမ္ဘာ့ကျန်းမာရေးအဖွဲ့ချုပ်ကထောက်ပြသည်။
မတ်လ ၁၇ ရက်ညပိုင်းအထိစာရင်းများအရ မြန်မာနိုင်ငံတွင် COVID19 ရောဂါပိုးမတွေ့ရှိရသေးကြောင်း ကျန်းမာရေးနှင့်အားကစားဝန်ကြီးဌာနကထုတ်ပြန်ထားသည်။ စောင့်ကြည့်လူနာ ၁၄၂ ဦးရှိပြီး သံသယလူနာ ၂ နှစ်ဦးရှိကြောင်းဝန်ကြီးဌာနကထုတ်ပြန်သည်။
လောက်ကိုင်မြို့ထဲတွင်သွားလာနေကြသူ ၃၀ ခန့်ကို ဟု ဖရန်တီယာက ကျပန်းမေးမြန်းရာ တရုတ်ပြည်တွင်ရောဂါစတွေ့သည့် တရုတ်နှစ်သစ်ကူးကာလကသာကြောက်ရွှံ့ခဲ့ကြပြီး လက်ရှိတွင် ထိုစဉ်ကလောက်ထိတ်လန့်တကြားမရှိတော့ဟုဆိုကြသည်။

လောက်ကိုင်မြို့၊ဗမာတန်းတွင်လည်း အသွားအလာ၊အစားအသောက်၊အရောင်းအဝယ်မပျက်ပေ။

လောက်ကိုင်မြို့ရှိ ဗမာတန်း။ဓာတ်ပုံ-နန္ဒ

ထို့အပြင် လောက်ကိုင်နှင့်ကပ်ရပ်မြို့ဖြစ်သည့် တရုတ်နိုင်ငံနမ်ဆန်ဘက်တွင် ကိုရိုနာကြောင့်သေဆုံးသည့်သတင်းမကြားရခြင်းကလည်း သူတို့အတွက်စိတ်သက်သာရာရစေသည်။
“ဒီဗိုင်းရပ်စ်ကိုမကြောက်ပါဘူး။ ဒါပေမဲ့ ကိုယ့်ကိုကိုယ်ကျန်းမာအောင်နေတယ်။လူထူတဲ့နေရာမသွားဘူး”ဟု စစ်တပ်မှ အရပ်ဘက်သို့ပြောင်းလဲတာဝန်ထမ်းဆောင်နေသူ မြို့ပြနှင့်အိုးအိမ်ဖွံ့ဖြိုးမှုဦးစီးဌာနမှ လက်ထောက်ညွှန်ကြားရေးမှုးဦးမြင့်အောင်ကပြောသည်။
ရန်ကုန်မှလာရောက်အလုပ်လုပ်ကိုင်နေသည့် ဟိုတယ်ဝန်ထမ်းများနှင့်ကာစီနိုဝန်ထမ်းများကလည်း အိမ်ပြန်ရန်အစီအစဉ်မရှိပေ။
“ကျွန်တော်တို့ကို အလုပ်ဝင်ကာနီးတိုင်းအပူချိန်တိုင်းတယ်။ mask နဲ့ လက်ဆေးရည်လည်း ကုမ္ပဏီကဝေပေးတယ်။” ဟု ဝန်ထမ်းတစ်ဦးကပြောသည်။
သို့သော် ဖျားနာသူတွေ့လျှင်သတင်းပေးရမည်ဟု ညွှန်ကြားထားကြောင်း သူကပြောသည်။
လက်ဆွဲနှုတ်ဆက်တာတွေမလုပ်ဖို့၊တစ်ယောက်နဲ့တစ်ယောက်သုံးပေခန့်ခွာဖို့ တားမြစ်ချက်တွေရှိပေမယ့်လို့ လောက်ကိုင်က ကာစီနိုဝိုင်းတွေမှာတော့ ဖဲနှစ်ချပ်ကို ထိုးသားတွေဝိုင်းအုံကြည့်နေကြဆဲပင်။
ရှမ်းအိမ်အချို့ရှိ ဘုရားစင်တွင် မိုင်းဖုန်းဆရာတော်ဘုရား၏ ဗိုင်းရပ်စ်အန္တရာယ်ကင်းရေးအစီအမံဟုဆိုကာ ” သပြေငါးခက်၊ဖယောင်းတိုင်ငါးတိုင်၊ဇီးသီးငါးလုံးနှင့်သံပရာသီးငါးလုံး”အား စီမံထားသည်ကိုလည်းတွေ့ရသည်။

ဒေသခံများ၏အဆိုအရ မိုင်းဖုန်းဆရာတော်၏အစီအမံဟုသိရသည်။ ဓာတ်ပုံ-နန္ဒ

ဖရန်တီယာ၏ကွင်းဆင်းလေ့လာချက်အရ ဂိတ်နှစ်ခုလုံးလူအဝင်အထွက်ကိုပိတ်မထားဘဲ ဝင်ရောက်လာသူများကို အပူချိန်တိုင်းကိရိယာဖြင့်တိုင်းတာပြီးဝင်ခွင့်ပြုသည်။ သို့သ?